എന്‍റെ സ്വപ്നം

പച്ചപ്പുല്ലുകള്‍ക്കിടയിലൂടെ പട്ടുപാവാടയും പാദസരവും അണിഞ്ഞ് ഓടിച്ചാടിനടക്കുന്ന ഞാന്‍. എന്‍റെ കൂടെ ഒരു കുട്ടിക്കുറുമ്പനുമുണ്ട്- ഞങ്ങളുടെ ഇനു. കഥകളും കവിതകളും പറഞ്ഞുതരുന്ന മമ്മി. മിഠായിയും ഉടുപ്പുകളും വാങ്ങിത്തരുന്ന ഡാഡി. എന്തിനും ധൈര്യം നല്‍കുന്ന പപ്പ. എല്ലാറ്റിലും താങ്ങായി നില്‍ക്കുന്ന മമ്മ. പാട്ടുകള്‍ പാടിത്തരുന്ന മാമ. നിറയെ തമാശകള്‍ പറയുന്ന ഉംബ്ലു. കൂടെക്കളിക്കാന്‍ മോളുട്ടിയും നീനുവും. മയില്‍പ്പീലികളുടെ വര്‍ണങ്ങളും മലര്‍വാടിയിലെ ചിത്രശലഭങ്ങളും പെയ്തു തോര്‍ന്ന മഴയില്‍ നനഞ്ഞുനില്‍ക്കുന്ന ഇലകളും സൂര്യന്‍റെ ഒളിച്ചുനോട്ടവും ചന്ദ്രന്‍റെ കണ്ണാരംപൊത്തിക്കളിയും കുഞ്ഞുനക്ഷത്രങ്ങളുടെ തിളക്കവും എല്ലാം കാണിച്ച് എന്നെ സന്തോഷിപ്പിക്കുന്ന എന്‍റെ നാട്. ഈ ദുബായിലെ ഫ്ലാറ്റില്‍ കൂട്ടുകാരില്ലാതെ, പച്ചപ്പുകാണാതെ മടുക്കുമ്പോള്‍ ഞാന്‍ കാണുന്ന മധുരമുള്ള സ്വപ്നമാണിത്.